Ca. Avq 5th, 2021

Azərbaycan pomidorları yalnız bir istiqamətdə deyil, bir çox istiqamətlərə ixrac olunmalıdır və bura Avropa bazarları da daxildir.

Bunu “APA-Economics”ə Avropa İttifaqının (Aİ) Azərbaycandakı nümayəndəliyinin rəhbəri, səfir Kestutis Yankauskas deyib.

“Məsələn, Azərbaycan fındıq ixracında çox uğurludur və ölkənin ixrac bazarına bir neçə Avropa ölkəsi də daxildir. Bu təcrübəni pomidor ixracında da tətbiq etmək üçün keyfiyyətə olduqca ciddi nəzarət edilməlidir. Fındıq ixracı üçün nəzarət sistemi əla qurulub. Təbii ki, pomidor və ya digər meyvə-tərəvəzlərə də eyni səviyyəli nəzarət tətbiq olunarsa, onların Aİ-yə ixracı həyata keçirilə bilər. Azərbaycan pomidorları Avropa bazarlarında olmalıdır”, – deyə səfir bildirib.

K. Yankauskas əlavə edib ki, hazırda Aİ-nin Azərbaycanda fitosanitar yoxlamalara kömək edən və həmin təşkilatlarla əməkdaşlıq quran bir neçə layihəsi və Lənkəran rayonunun sosial-iqtisadi inkişafını dəstəkləyən proqramı var.

Bundan əvvəl Aİ-in rəsmisi bildirmişdi ki, Azərbaycanın Avropaya meşə fındığı və tomat tədarükünün böyük potensialı var və digər bazarların volatil olduğu halda, Aİ dayanıqlı ixrac bazarıdır.